Воздвижение Честного и Животворящего Креста Господня

Спаси, Господи, люди Твоя/ и благослови достояние Твое,/ победы на сопротивныя даруя// и Твое сохраняя Крестом Твоим жительство.

Вознесыйся на Крест волею,/ тезоименитому Твоему новому жительству,/ щедроты Твоя даруй, Христе Боже,/ возвесели нас силою Твоею,/ победы дая нам на сопостаты,/ пособие имущим Твое оружие мира,// непобедимую победу.

О, Пречистый и Животворящий Кресте Господень! Древле убо был еси казни позорныя орудие ныне же знамение спасения нашего – присно почитаемое и прославляемое! Како достойне возмогу аз недостойный воспети Тя и како дерзну преклонити колена сердца моего пред Искупителем моим, исповедая грехи свои? Но милосердие и неизреченное человеколюбие Распеншагося на тебе смиренное дерзновение подает ми, да отверзу уста моя во еже славити Тя; сего ради вопию Ти: радуйся, Кресте, церкве Христовы – красота и основание, всея вселенныя – утверждение, христиан всех – упование, царей – держава, верных – прибежище, ангелов – слава и воспевание, демонов – страх, губительство и отгнание, нечестивых и неверных – посрамление, праведных – пристанище, заблудших – наставниче, одержимых страстьми – раскаяние, нищих – обогащение, плавающих – кормчий, слабых – сила, во бранех – победа и одоление, сирых – верное покровение, вдов – заступниче, дев – целомудрия охранение, ненадеянных надежда, недужных – врач и мертвых – воскресение! Ты прообразованный чудотворящим жезлом Моисея – животворный источник, напаяющий жаждущия духовныя жизни и услаждающий наши скорби, Ты – одр, на нем же царственно почил тридневно Воскресший Победитель ада. Сего ради и утро и вечер и полудне прославляю Тя, треблаженное Древо, и молю волею Распеншагося на Тебе, да просветит Он и укрепит Тобою ум мой, да открыет в сердце моем источник любве совершенней и вся деяния моя и путие мои Тобою осенит, да выну величаю Пригвожденнаго на Тебе, грех моих ради, Господа Спасителя моего. Аминь.

В день памяти Воздвижения Честнаго и Животворящего Креста Господня в нашем храме была отслужена Литургия настоятелем храма иереем Евгением в сослужении второго священника иереем Андреем.