Ноя
Собор Архистратига Михаила и прочих Небесных Сил бесплотных
Тропарь Небесным Чинам Бесплотным
Небесных воинств Архистратизи,/ молим вас присно мы недостойнии,/ да вашими молитвами оградите нас/ кровом крил невещественныя вашея славы,/ сохраняюще ны пpипадающия прилежно и вопиющия:/ от бед избавите ны,// яко чиноначальницы вышних Сил.
Тропарь Архангелу Михаилу
Небесных воинств Архистратиже,/ молим тя присно мы недостойнии,/ да твоими молитвами оградиши нас/ кровом крил невещественныя твоея славы,/ сохраняя нас, припадающих прилежно и вопиющих:/ от бед избави нас,// яко чиноначальник вышних Сил.
Кондак Небесным Чинам Бесплотным
Архистратизи Божии,/ служителие Божественныя славы,/ Ангелов начальницы, и человеков наставницы,/ полезное нам просите, и велию милость,// яко Безплотных Архистратизи.
Кондак Архангелу Михаилу
Архистратиже Божий,/ служителю Божественныя славы,/ Ангелов начальниче и человеков наставниче,/ полезное нам проси и велию милость,// яко Безплотных Архистратиг.
Молитва святому Архангелу Михаилу
О, святый Михаиле Архангеле, светлообразный и грозный Небеснаго Царя воеводо! Прежде Страшнаго Суда ослаби ми покаятися от грехов моих, от сети ловящих избави душу мою и приведи ю к сотворшему ю Богу, седящему на Херувимех, и молися о ней прилежно, да твоим ходатайством послет ю в место покойное. О грозный Воеводо Небесных Сил, предстателю всех у Престола Владыки Христа, хранителю твердый всем человеком и мудрый оружниче, крепкий Воеводо Небеснаго Царя! Помилуй мя, грешнаго, требующаго твоего заступления, сохрани мя от всех ви́димых и невидимых враг, паче же подкрепи от ужаса смертнаго и от смущения диавольскаго и сподоби мя непостыдно предстати Создателю нашему в час страшнаго и праведнаго Суда Его. О всесвятый великий Михаиле Архистратиже! Не презри мене, грешнаго, молящагося тебе о помощи и заступлении твоем, в веце сем и в будущем, но сподоби мя тамо купно с тобою славити Отца и Сына и Святаго Духа во веки веков. Аминь.
